حمامات

في كل عزومه في بيتي كانت حماتي لازم تتدخل وتبوظ كل ترتيبي وكمان تعزم كل اللي تعرفهم من قريب وبعيد من غير ما تقولي كأنه بيتها وتسيبني محتاسه في الطبيخ لكل الموجودين ، بس في اخر عزومه فاجأتها حتت مفاجأه! كل عزومة او مناسبه حماتي كانت لازم تيجي قبل الميعاد بساعات، تدخل الشقة كأنها صاحبة البيت، تنكش في السفرة، تعدّل الرّصة، وترص الأطباق على مزاجها، وتوشوش الضيوف قدامي بصوت مسموع: "أصل ابني حبيبي مايعرفش ياكل ولا يعيش عِيشة عدلة لو ما اتدخلتش بنفسي وظبطت له كل حاجة!" جوزي «أحمد» كان دايماً يطبطب عليا ويعدّيها بضحكة: "كبري دماغك يا بنت الحلال، عدّي اليوم عشان خاطري." بس الموضوع كان بيزيد عن حده كل سنة. بقت تعزم ناس أغراب وقرايب من بعيد أوي من غير ما تقولي ولا حتة تستئذن، وتيجي في الآخر تقول بخبث: معلش يا حبيبتي، أنتِ عارفة إنك زي الضيفة هنا وناسنا هما ناسك !" ساعتها بصيت لأحمد.. وبصيت لوش حماتي.. وبصيت لسفرتي وبيتي كله. أحمد لاحظ النظرة وقال لي بقلق: — "سهام انتي ناوية على إيه؟" ابتسمت بهدوء من غير ما أجادل، ولا أعمل مشكلة، وقلت له كلمة واحدة: — "ولا حاجة يا حبيبي.. كله تمام." وجه يوم العزومة اللي بعدها .. زي ما توقعت تماماً، الشارع بدأ يتملي عربيات، والباب يخبط، وناس أول مرة أشوفهم في حياتي طالعين على السلم، شايلين علب حلويات وداخلين على السفرة مباشرة. حماتي طبعاً عزمت نص المعارف بدون علمي، وعاملة فيها العمدة اللي بيوزع الكرم ! بس اللي حماتي ما كانتش تعرفه.. اني كنت عامله حسابي ومستعده! وبعد ما استقبلت ورحبت وعزمت على الناس يقعدوا على السفره جاتلي المطبخ وسالتني بابتسامة: — "أومال فين الصواني والأكل يا عروسة؟ السفرة فاضية ليه؟الناس مستنين بقالهم كتير ضحكت لها بكل بساطة وقلت لها: —اكل ايه انا معملتش اكل "أصل يا طنط، بما إنك عزمتِ كل الحبايب دول ودخلتِ البيت كأنه بيتك، أنا اعتبرت نفسي «ضيفة» زي ما بتقوليلي دايماً.. يعني انا ضيفتك زيي زيهم، والضيف مبيشتغلش ولا يطبخ هروح اقعد مع الضيوف وانتي اتصرفي في بيتك!" سبتها ودخلت الصاله وهيه وقفت مكانها مش قادره تنطق ولا عارفه تعمل ايه في المصيبه دي واخوها من بره بيزعق بضحك ويقول...ياجماعه يلا متنا جوع !! وش الست اتخطف، والدم هرب من عروقها في ثانية واحدة. بقت بتبصلي بعينين متسعة من الصدمة، شفايفها بترتعش ومش قادرة تطلع كلمة واحدة عدلة. كانت متعودة إني بستسلم، إني ببتلع إهاناتها ولماضتها وبجري زي المفرمة في المطبخ عشان أستر وش ابنها، لكن المرة دي الس\كينة وصلت للعظم! سيبتها واقفة تتلوى في مكانها في المطبخ وسط الحلل الفاضية والرخام النضيف اللي بيبرق، ومشيت بخطوات ثابته وواثقة للصالون. كان البيت مليان عن آخره؛ أعمام أحمد، وعماته، وأولاد عماته اللي ماشفتش نصهم من يوم الفرح، غير جيرانها القدامى اللي جيباهم تتفاشخر قدامهم. قعدت على الكرسي الرئيسي في الصالون، حطيت رجل على رجل، وابتسمت ابتسامة عريضة للناس: — "أنورتوا يا جماعة.. يا مرحب بيكوا في بيت أختكوا وأمكوا الحاجة! نورتونا والله." أحمد كان واقف جنب الباب، وشّه بيجيب ألوان. جه عليا بلهفة ووشوشني وهو بيعرّق من الإحراج: — "سهام! إيه الهزار ده؟ الناس ماتت من الجوع، وعمي حسين عمال ينداه من بره.. فين الصواني؟ فين البشاميل والدقايق اللي قلتي بتجهزيهم؟" بصيت له بمنتهى الهدوء وقلت بصوت واضح يسمعه اللي جرانبنا: — "هزار إيه يا أحمد؟ هي مامتك مش كل عزومة بتقول قدام الناس إن البيت بيتها وإن أنا زي الضيفة هنا؟ خلاص، أنا قررت أسمع كلامها وما أكسرش كلمتها.. أنا ضيفة النهاردة زيي زي عمك حسين بالظبط، وأمك جوه بتتصرف في بيتها ومطبخها!" في اللحظة دي، طلعت حماتي من المطبخ، وشها أصفر زي الليمونة المصرورة، وبتحاول تبتسم ابتسامة صفرا قدام الضيوف وهي بتمسح عرق جبينها بالطرحة. عم أحمد بص لها وقال بضحكة مجاملة: — "إيه يا أم أحمد؟ الجوع كافر يا ختي! الشارع كله ريحته طالعة من شوارع المحلة، ولا إنتي مجهزة لنا مفاجأة؟" حماتي بلعت ريقها بالعافية، وبصتلي بصة كلها غل وشر، وقالت بصوت مخروم: — "أصل.. أصل الأكل.. معلش يا حسين، الصواني بتاخد وقت في الفرن.. أصل العروسة..." قطعت كلامها فوراً وبصيت للضيوف بابتسامة بريئة جداً: — "لا يا طنط ما تدبسينيش! أنتِ عارفة إني ما حطتش إيدي في حلة واحدة النهاردة، وبصراحة أنتِ أدرى ببيتك وبأكلك اللي ابنك بيحبه، ما حبتش أدخل في اللي ماليش فيه عشان السفرة تطلع على مزاجك زي كل مرة!" الهمس بدأ يدور بين الستات في الصالون. مرات عم أحمد بصت للثانية وابتسمت خبث، والرجالة بدأت تتملل في قعدتها. أحمد أدرك المصيبة، وجري على المطبخ يلحق أمها، وأنا قعدت أضايف الناس وبصب لهم شاي وعصير كان جاهز في التلاجة بكل برود أعصاب. من جوه المطبخ، كانت الأصوات بدأت تعلى بالوشوشة الزعيق: — "يعني إيه مافيش أكل يا أمي؟! عزمتي أكتر من تلاتين بني آدم على إيه؟!" — "أنا إيش عرفني إن المفتريّة دي هتنفذ كلامها؟! دي كانت بتسمع وتسكت! اتصرف يا أحمد، انزل هات دليفري.. هات كباب وكفتة ولا أي داهية نستر بيها وشنا!" — "أجيب دليفري لتلاتين فرد منين دلوقت!! دي تتكلف ألوفات! وبعدين المحلات في الحتة هنا هتأخد ساعتين على ما تجهز الأوردر ده كله!" المنظر جوه كان عبارة عن قنبلة موقوتة. حماتي بقت تفتح التلاجة وتقفلها بهستيريا، تفتح الفريزر تلاقي فراخ نية ولحمة مفرومة مش مطبوخة، والوقت بيمر، والساعة بقت تمانية بالليل، والضيوف أمعائهم بتصوصو! فجأة، عم أحمد قام وقف في نص الصالون وقال بصوت جهوري هز البيت: — "جرى إيه يا جماعة؟ هو إحنا جايين نتفرج على بعض ولا إيه؟ لو مفيش عشا قولولنا عشان ننزل نأكل في أي مطعم، إحنا بقالنا ساعتين قاعدين على المايه والعصير!" خرجت حماتي من المطبخ وهي جايبة أخرها، الروج متمسح، وطرحتها معوجة، وبصتلي وعيونها بتطلع شرار، وقالت بصوت طالع بالعافية قدام الكل: — "معلش يا حسين.. أصل السهام هانم قررت النهاردة تعمل عليا أبلة نبلة وتلعب لعبة رخيصة عشان تصغرني قدامكوا!" الصالون كله سكت.. أحمد خرج من المطبخ ووشه في الأرض من الفضيحة.. وأنا وقفت من على الكرسي بكل هدوء، وبصيت لحماتي في عينها مباشرة وقلت: — "تؤ تؤ يا طنط.. أنا ما صغرتكيش.. أنتِ اللي صغرتِ نفسك لما افتكرتِ إنك تقدي تفتحي بيت ومش قد شيلته!" ولسه أحمد حيتكلم يهدّي الجو، رن جرس الباب رنة قوية.. ولما أحمد فتح الباب، كانت المفاجأة الكبرى اللي دخلت وقفت الكل على رجل وحدة وخلت حماتي تقع على أقرب كرسي من الهدمة! حماتي أغمى عليها تقريباً وهي بتشوف مين اللي واقف على الباب! كانت أختها الكبيرة "الحاجة صفية" -اللي بينها وبين حماتي قطيعة ومشاكل من سنين على ميراث قديم- ووراها عيالها وأجوازهم بعيالهم! أنا طبعاً كنت عارفة إن حماتي كانت بتتباهى قدام نسوان العيلة بالكدب وتقولهم إنها صالحت أختها، فاستغليت الفرصة وقبل العزومة بليلة اتصلت بالحاجة صفية وعزمتها بمنتهى الأدب وقلت لها: "الحاجة أم أحمد تحلف وتصر إنك تكوني رأس المائدة النهاردة وإن البيت بيتك والمياه ترجع لمجاريها!" الحاجة صفية دخلت بهيبتها، وبصت لحماتي المنتفخة على الكرسي وقالت بصوت رنان: — "مساء الخير يا أم أحمد.. كتر خيرك إنك افتكرتِ أختك الكبيرة وعزمتينا على السفرة العامرة دي.. ولا إحنا مالناش نصيب في كرمك اللي العيلة كلها بتتكلم عنه؟" البيت بقى عبارة عن شوادق! الصالون أتسد بالضيوف، العدد دخل في قرب أربعين فرد، وحماتي بقت تبص لأختها وتبصلي وعينيها طالع منها شرار هيولع في الصالة. أحمد جوزي كان واقف هيطق من كتر الإحراج والضغط، وشه بقى أزرق ومبقاش عارف يتكلم ولا يداري الخيبة فين. الحاجة صفية قعدت، وبصت للترابيزة الفاضية وقالت باستغراب: — "أومال فين الأكل يا أم أحمد؟ ده الساعة بقت تسعة بالليل! ولا عزمتينا عشان نقعد نتفرج على بعض والولاد الصغار يصرخوا من الجوع؟" هنا حماتي مقدرتش تمسك نفسها، وقامت وقفت ونفضت جلابيتها وقالت وهي بتشاور عليا بصابع بيرتعش من الغل: — "الأكل عند الهانم! الهانم مرات ابنك اللي حبت تعمل عليا معلمة وقافلة المطبخ وما طبختش ولا لقمة، عشان تصغرني قدامكوا وتفضحني في العيلة!" الناس كلها بصتلي باستنكار ومفاجأة. أحمد بصلي برجاء إن ينقذ الموقف، لكن أنا وقفت بكل برود ثلجي، وعدلت طرحتي وابتسمت ابتسامة هادية جداً وقلت بصوت واطي ومسموع للكل: — "يا جماعة صلوا على النبي.. أنا ما قفلتش المطبخ ولا حاجة، المطبخ مفتوح أهو بحلله وصوانيه. بس كل عزومة، طنط بتدخل تقولي قدامكوا كلكم: (إنتِ زي الضيفة هنا، أنا صاحبة البيت وأنا اللي بظبط كل حاجة لابني).. وأنا بصراحة حبيت أريحها المرة دي، وأسيب صاحبة البيت هي اللي تقوم بواجب ضيوفها اللي عزمتهم بنفسها ومن غير ما تقولي على أسمائهم حتى! هو الضيف بيطبخ لضيوف صاحب البيت برضه؟" الصالون كله سكت سكتة موت. الحاجة صفية بصت لأختها وضحكت ضحكة عالية فيها شمتة العمر: — "الله الله يا أم أحمد! يعني عزمانا كلنا وجايبانا من أخر الدنيا على بيت مرات ابنك، وإنتِ أساساً مش عاملا حساب لقمة واحدة ولا حتى متفقة معاها؟! بقيتي تعزمي الناس على أكل غيرك وتعملي فيها الكريمة على حساب مرارة البنت؟!" مراته عم أحمد وقرايبها بدأوا يتهامسوا ويضحكوا تحت الضرس. حماتي وشها بقى يجيب ألوان الطيف، والدموية طارت من وشها وبقت تنهد بصوت عالٍ من كتر الغيظ والإهانة قدام أختها اللي بتكرهها. أحمد قرب مني بحدة ووشوشني وهو بيجز على أسنانه: — "سهام! كده كتير.. إنتِ كده بتكسري أمي قدام العيلة كلها! اتصرفي واعملي أي حاجة نستر بيها الفضيحة دي بدل ما البيت يخرب النهاردة!" بصيت لأحمد بمنتهى القسوة والجمود وقلت له بصوت واطي: — "البيت مش هيخرب بسببي يا أحمد.. البيت بيكبر لما كل واحد يعرف حده ويحترم صاحب المكان. أمك هي اللي جابت الناس دي وهي اللي تتصرف." في اللحظة دي، حماتي عشان تهرب من موقف الفضيحة والشمتة، عملت نفسها داخت ومسكت راسها وقالت وهي بتترمى على الكرسي: — "آه ياني.. قلبي.. الحقني يا أحمد.. الضغط واطي وراسي بتلف.. الحق أمك يا ابني!" أحمد انخض وجري عليها، والستات اتلموا حواليها. بس أنا كنت عارفة حركاتها الحافظاها عن ظهر قلب.. ابتسمت بخبث، وقربت منها وسط الزيطة وقلت بصوت عالي خلى الصالون كله يسكت ويسمع المفاجأة الثانية اللي كنت مجهزاها! قربت منها بثبات ودخلت وسط الزيطة، مسكت إيدها وبصيت في عينها اللي كانت موارباها عشان تشوف رد فعل الناس، وقلت بصوت جهوري يسمعه أقاصي الصالون: — "سلامتك يا طنط! بس ما تقلقيش خالص، أنا عاملة حسابي للحظة دي بالذات.. أصل أنا عارفة إن الضغط بيعلى لما الواجب بيكثر ومفيش أكل يتقدم للضيوف!" حماتي فتحت عين واحدة بذهول، وأنا كملت وأنا ببتسم وببص للحاجة صفية ولعم أحمد: — "أنا عارفة إن طنط كريم أوي وعايزة توكلكم أحسن أكل، وعشان عارفة إن المطبخ مجهد عليها ومظلومة في العدد الكبير ده.. أنا طلبت أوردر فاخر جداً من أكبر مطعم كباب وكفتة مشويات في البلد، تكفي الأربعين فرد وزيادة، والأكل ز زمانه واصل على الباب في أظرف دقايق!" الرجالة في الصالون وشهم اتفرَد، وعم أحمد قال بابتسامة عريضة: — "الله عليكِ يا عروسة! الأصيلة أصيلة والله.. فرجتيها من وسع!" أحمد جوزي تنفس الصعداء، وبصلي بنظرة إمتنان وراحة كأنه كان في كابوس وصحي منه، وقرب يهمسلي: — "تسلم إيدك يا سهام.. كتر خيرك إنك أنقذتِ الموقف وسدّيتي الفضيحة دي.. أنا كنت هقسط حق الأوردر ده من المصروف." مسكت إيد أحمد بكل هدوء، وابتسمت له ابتسامة أبرد من الثلج وقاطعه بصوت واضح ومسموع للكل: — "تقسط إيه يا أحمد؟ لا طبعاً! هو إنت اللي عزمت الناس دي كلها من ورايا؟ ولا أنا اللي عزمتهم؟ طنط هي صاحبة العزومة وهي الكريمة اللي عزمت العيلة كلها، وعشان كده أنا طلبت الأوردر باسمها وهي اللي هتتدفع ثمنه كاش فوراً أول ما الدليفري يخبط على الباب!" في اللحظة دي، حماتي قامت قعدت زي العفريت اللي نط من العلبة! نسيت الدوخة ونسيت الضغط، وبصتلي بعيون مرعوبة وقالت بصوت صريخ: — "إيه؟! أدفع ثمن أوردر مشويات لأربعين بني آدم منين يا حسرة؟! إنتِ تجننتِ يا سهام؟!" ابتسمت لها بمنتهى البراءة وقلت: — "جرى إيه يا طنط؟ مش إنتِ لسة قابضة الجمعية الكبيرة إمبارح ومجهزة المبلغ في شنطتك؟ ولا يصح عزومتك في بيتك والضيوف الكبار دول -وعلى رأسهم أختك الحاجة صفية اللي بقالكوا سنين ما اتجمعتوش- ياكلوا أي كلام؟ دي أقل حاجة تليق بمقام عزومتك!" الحاجة صفية هزت رأسها وهي بتضحك بظلم وشماتة وقالت: — "أيوه والله يا أم أحمد، أختك كبرت وبقى لها مقام.. ولا المشويات خسارة فينا وفي عيالنا اللي عزمتيهم بنفسك؟" حماتي بقت تمصمص شفايفها ووشها أصفر وأحمر وأسود، مش قادرة تقول "مش حادفع" عشان ما تفضحش نفسها قدام أختها والعيلة وتطلع بخيلة، ولا قادرة تطلع الألوفات اللي حوشتها بالعافية من الجمعية! وفي وسط الزحمة دي، جرس الباب رن رنة طويلة.. الدليفري وصل! أحمد فتح الباب، والعامل كان شايل أكياس وعلب حرارية طالعة منها ريحة المشويات والريش الريحة اللي دوخت الشارع كله، وحط الصواني على السفرة الفاضية. العامل مسك الفاتورة وبص للصالون وقال بصوت عالي: — "الحساب يا جماعة.. المطلوب تسعة الآف وخمسمية جنيه!" الرقم نزل على دماغ حماتي زي الصاعقة، بقت تبص لشنطتها كأنها بتشوف حبل الإعدام! طلعت الفلوس بإيد بتترعش، وكل ورقة بتمسحها بتخرج من دمها. والناس بدأت تتلم على السفرة تاكل وتهلل وتمدح في "كرم الحاجة أم أحمد". حماتي قعدت في الزاوية مش قادرة تحط لقمة في بقها من القهرة، وبصتلي بنظرة انتقام مرعبة وقالت بصوت واطي جداً وهي بتجز على أسنأنها لما قربت منها: — "وديني وما أعبد يا سهام.. لرد لك الصاع صاعين، ولأخلّي أحمد يكتبلي الشقة دي بكرة الصبح وأرميكِ في الشارع بالهدوم اللي عليكِ!" ابتسمت لها بكل برود، وحطيت حتة كباب في طبقي وقلت لها: — "نشوف موضوع الشقة ده بكرة يا طنط.. بس الأول اتفضلي كلي، ده الأكل بفلوسك!" لكن اللي حماتي ما كانتش تعرفه، إن المفاجأة القاضية الحقيقية ما كانتش الأوردر ولا الفلوس.. المفاجأة الحقيقية كانت جوة شنطتي، والورقة اللي كانت هتغير مجرى حياتنا كلنا بدأت تظهر لما أحمد مسك تليفونه وجاته مكالمة غريبة جداً خلت ألوان وشّه تروح فوراً! أحمد مسك التليفون، ووشه اتخطف في ثواني. العرق بدأ ينزل من قورته بغزارة، والقمة اللي كانت في بقه وقفِت وزرّقت في زوره. رد بصوت مكسور وبيرتعش: — "إيه؟! أنت بتتكلم جد يا استاذ حسن؟.. للدرجة دي؟.. طب.. طب أرجوك أديني مهلة لبكرة!" الصالون كله سكت، والمعالق اتعلقت في الهواء. حماتي نسيت قهرتها على التسع آلاف وخمسمية جنيه، وقامت وقفت بلهفة وهي بتبص لابنها برعب: — "في إيه يا أحمد؟ مين اللي بيكلمك يا ابني؟ وشك بقى زي الميتين ليه؟!" أحمد نزل التليفون من على ودنه بإيد بتترعش، وبص لأمه بعيون كلها حسرة وذهول وقال بصوت طالع بالعافية: — "ده المحامي يا أمي.. بيقولي إن فيه دعوى تمكين وقض\ية طرد مرفوعة عليا، وإن لو ما سددتش الشيكات والمتأخرات اللي عليا لشريكك القديم، الشقة دي حتتباع في المزاد العلني الأسبوع الجاي!" حماتي صرخت ولطمت على وشها قدام أختها والعيلة: — "مزاد إيه يا مهدود الحيل؟! هي الشقة دي مش بتاعتك وبفلوسك؟!" أحمد بلع ريقه وبص للأرض بإحراج قاتل قدام أعمامه وأخواله اللي قاعدين بياكلوا: — "أنا.. أنا كنت واخد وصل أمانة وشيكات من كذا سنة عشان أفتح المحل وشغلي، وأمي كانت ضامنة معايا، والظاهر الشريك قدم الشيكات للمحكمة بعد ما التأخير زاد!" هنا، الحاجة صفية حطت الشوكة من إيدها، وبصت لحماتي بضحكة صفرا وقالت: — "الله الله يا أم أحمد! ده إنتِ طلعتِ مش بس بتعزمينا على أكل مش بتاعك، ده إنتِ كمان قاعدة في بيت مهدد بالرمية في الشارع وبتتفشخري عليا وعلى العيلة بالكدب؟!" حماتي بقت تتلفت حوالين نفسها زي الفرخة المذبوحة، مش عارفة تداري الفضيحة فين. وبصت لأحمد بزعيق وهي بتترعش: — "ما تتصرف يا أحمد! اطلب مهلة! شوف حد يسلفنا! اتصرف بدل الفضيحة دي!" أحمد بص لها بقلة حيلة وكسرة عين وقال: — "أسلف مين يا أمي؟ حد يسلفني مبلّغ زي ده في يوم وليلة؟! إحنا كده خلاص.. اترمينا في الشارع رسمي!" في اللحظة دي، الكل كان متوتر، والهمس زاد، والناس بدأت تلم إيدها من الأكل بكسوف وإحراج. وقفت أنا من على السفرة بكل هدوء وثقة، فتحت شنطتي الصغيرة اللي كانت جنبي، وطلعت منها أظرف أسود مقفول بختم رسمِي. مشيت بخطوات ثابتة وسط ذهول الكل، وحطيت الظرف على الترابيزة قدام أحمد وأمه مباشرة. حماتي بصت للظرف برعب وقالت: — "إيه ده يا سهام؟ إنتِ كمان جايبة مصيبة جديدة فوق راسي؟!" ابتسمت ابتسامة هادية جداً، وبصيت لحماتي في عينها بجمود وقلت: — "لا يا طنط.. دي مش مصيبة.. ده السر اللي أنا مخبياه عنكم من ست شهور، والأوراق الرسمية اللي حتحدد مين اللي ليه حق يفضل في البيت ده، ومين اللي حيمشي منه فوراً!" أحمد مسك الظرف الأسرود بإيد بتترعش، وفتحه ووشه كل مدى بيصفرّ ويزرّق. طلعت الأوراق الرسمية، وبدأ يقرأ البنود بصوت طالع بالذخيرة بالعافية: — "عقد شراء نهائي.. وخالص الثمن.. لشقة.. باسم السيدة: سهام..." حماتي نطت من مكانها زي المجنونة، خطفت الورق من إيده وعيونها هتطلع من مكانها، وبقت تقرأ وهي بتلطم على صدرها: — "إيه ده؟! عقد إيه؟! وشراء إيه؟! الشقة دي ابن أحمد هو اللي شاريها من عرق جبينه!" بصيت لها بمنتهى الثبات والبرود وقلت لها قدام أختها الحاجة صفية وكل العيلة اللي كانوا واقفين مشدوهين: — "ابنك أحمد لما شغله وقف وتزنق في الشيكات من ست شهور، وكان خايف يتقبض عليه أو الشقة تضيع في المزاد، جه اترجاني أساعده.. وأنا طلبت من بابا يبدالي ورثي بدري، وسددت كل ديون أحمد والشيكات اللي كانت هتحبسه، واشتريت منه الشقة بعقد بيع وشراء نهائي وبصمته وشهدنا عليه المحامي!" الصالون كله شهق! الحاجة صفية بصت لأختها وضربت كف بكف وضحكت بقلب: — "يا دي الخيبة السودا يا أم أحمد! طالعة نازلة تتفشخري وت قولي بيتي وناسي، وتعاملي البنت كأنها ضيفة، وفي الآخر طلعتي أنتِ وابنك قاعدين في بيتها وبفلوسها ور حمتها؟!" حماتي بصت لأحمد بذهول وقهر وشتمته بصوت عالي: — "يا خايب يا ابن الخايب! تبيع شقتك لمراتك من ورايا وتعمل في أمك كده؟!" أحمد نزل رأسه في الأرض وبص لأمه بكسرة وندم وقال: — "أنا أسف يا أمي.. بس سهام هي اللي أنقذتني من الحبس والفضيحة يوم ما أنتِ مشغولة بتلمي الجمعيات عشان تتفشخري بيها على الناس.. هي اللي سترتني واستحملت إهاناتك كل الفترة دي عشان ما تكسرنيش قدامك!" هنا وقفَت واستعدلت وقلت بصوت صارم هز الصالة كلها: — "أنا سكتّ كتير يا طنط.. استحملت تدخلك في حياتي، وكسرتك لنفسي في بيتي، وعزوماتك اللي من غير إذن، وقلة احترامك ليا قدام الغريب والقريب.. كل ده عشان خاطر أحمد وسكوته.. بس لحد هنا وخط أحمر!" حماتي بقت تترعش من الغيظ والإحراج قدام سلفتها وأختها والضيوف اللي بدأوا ينسحبوا واحد ورا التاني بكسوف شديد من الموقف. قربت من حماتي وفتحت باب الشقة على آخره وقلت بكل حسم: — "من النهاردة، البيت ده بيتي أنا.. بفلوسي وباسمي.. العزومة الجاية لو حبتِ تيجي، هتستأذني زي أي ضيفة محترمة وتيجي في ميعادك، ولو ما احترمتيش صاحبة البيت، يبقى باب الشقة ده مش هيتبلتب ليكي تاني أبداً!" حماتي بصتلي بقلة حيلة ومش قادرة تنطق كلمة واحدة، شالت شنطتها المطبوقة المليانة إهانات وقهرة، وخرجت تجر رجليها بالعافية ورا أختها صفية اللي كانت بتضحك بشماتة، وأحمد واقف جنبي باصص في الأرض، وعارف إن من اليوم ده.. قواعد اللعبة كلها اتغيرت، وصاحبة البيت الحقيقية هي اللي مسكت الزمام!

حمامات

زهره الربيع

اترك تعليقاً إلغاء الرد

مقالات ذات صلة

تبرع بالدم

نتيجه الثانويه العامه

لو عرفتي ترقصي

فسخ خطوبه بنتي علي يد عمها

تفتيش الشنطه

زياره اخت جوزي

اترك تعليقاً إلغاء الرد